Brit Bildøen - Fokustittelforfattar

Gult farevarsel er ein av NORLAs fokustitlar høsten 2023. Her fortel forfattar Brit Bildøen om kva boka handler om, kven den er skreve for, kva som inspirerte ho til å skrive den og kor og når ho jobbar aller best.

Kva handler boka di om?

Kort fortalt handlar romanen om ei familiefeiring som ikkje går som planlagt. Feiringa går derimot frykteleg galt. Dorte har overtalt resten av familien til å feire foreldra sin gullbryllaupsdag på ein gjestegard langt til fjells. Ho skal snart angre på at ho ikkje høyrde på innvendingane frå dei andre. Det er seint i oktober, og det er meldt regn. Masse regn. Stemninga er altså ikkje heilt på topp når familien samlast på fredag kveld: Foreldra, storesøster Anette med mann og hund, og tvillingane Karl og Dorte. Når dei vaknar på laurdag morgon får dei vite at det har gått eit ras som har tatt med seg delar av vegen. Og i resepsjonen sit det to framande karar som har blitt innesperra saman med dei. I gangen står geværa deira. Dei to mennene seier dei skulle ut på revejakt, men det er det ingen som trur på. Og snart skjer det ting som set familien og det spinkle samhaldet mellom dei på ei hard prøve.

Kva inspirerte deg til å skrive denne boka?

Eg synest det er interessant å utsetje dei fiktive personane mine for uventa ting, eller legge press på dei og sjå kva som skjer. Korleis fungerer ein ganske vanleg familie med ganske vanlege motsetnader og konfliktar i ein ekstrem situasjon? I denne romanen skiftar synsvinkelen mellom dei tre søskena, slik at lesaren får med seg både det som blir sagt og det som ikkje blir uttalt.

Eg er også opptatt av å utforske natursynet i vår tid: Kva som skjer der menneske møter natur. Og i denne boka tar eg fatt i noko som eg lenge har tenkt på å skrive om, nemleg den stadig hardare konflikten rundt rovdyra våre. Jegerane i boka er sjølvsagt ikkje på revejakt, men ute etter ein ulvefamilie som held til i traktene rundt gjestegarden. Og dei går ikkje av vegen for å bruke ulovlege metodar.

Kven er denne boka for?

Eg trur det er ei bok som kan treffe mange, både dei som les for å la seg underhalde og dei som likar at bøker går litt djupare. Her er ei tilbakemelding frå ein bokhandlar: «Hei! Jeg digga denne boken, gikk fra solseng til solseng i ferien! Min gode venn tidl. politi (59 år) uttalte: Det er slike bøker jeg vil ha!»

Kor og/eller når jobbar du best?

Den beste skrivetida er morgonen og formiddagen, og eg kan komme langt med ein kopp kaffi med mjølk og sukker. Eg jobbar best på heimekontoret mitt, der eg ser rett inn i krona på eit enormt furutre. Treet har stadig besøk av skjærer, ringduer og meiser av mange slag. Eg er så heldig å bu sentralt i Oslo, men i eit område med store hagar og mange trær. Slik har eg ro rundt meg, men også pulsen og energien frå byen rett rundt hjørnet. Ein ideell kombinasjon for meg som treng begge deler. Mannen min og eg er også så heldige å eige eit hus i heimfylket vårt. Veiholmen er eit levande fiskevær på Nordvestlandet. Om sommaren fyller vi huset med gjester, i vinterhalvåret er det ei lun og stille skrivestue. Når det stormar og regnar som verst, er det ikkje stort anna å ta seg til enn å lese og skrive.

Se engelsk presentasjon av boka her

Les mer om forfatteren her

Se alle høstens fokustitler fra NORLA her