Gunnar Garfors - Fokustittelforfattar
Vi har gleda av å presentere forfattaren Gunna Garfors. Han har skrive Mellom linjene. På liv og død langs ekvator og polarsirklane, som er ei av NORLAs fokustitlar hausten 2025.
Kva inspirerte deg til å skrive denne boka?
Skogbrannar, flaumar, hetebølgjer, stormar og ekstremnedbørsdøgn er ikkje lenger unntak, men ein del av den nye normalen vi må forhalde oss til nærast uansett kvar vi er. I årevis har vi kvar einaste veke blitt bombardert med reportasjar, forskingsrapportar og innlegg som fortel om eller åtvarar mot effektane av global oppvarming. Den eine slår nærast den andre i hel, og dei fleste dommedagsvarsla kjem frå oss i Vesten, vi som «alltid veit best». Etter mange år på reise og besøk til alle verdas land har eg gjentekne gongar innsett at vi ikkje alltid har rett, gjer ting på den mest optimale måten eller er overlegne andre kulturar på nokon som helst måte. Det var medverkande til at eg tok avgjersla om ytterlegare globetrotting, denne gong for å snakke med heilt ordinære folk med ekstraordinære opplevingar og historier. Eg var ute etter synspunkta til ikkje-forskarane på bakken, elva og havet. På grunn av pandemien med tilhøyrande reiserestriksjonar og andre logistiske utfordringar tok det heile mykje lengre tid enn eg hadde trudd, frå idé til publisering gjekk det nesten eit tiår.
Kven er denne boka for?
Dette er ei reiseskildring med fokus på klimaendringane, og eg vonar å få både reiseglade og klimainteresserte lesarar til å tenke seg om nokre gonger på neste reise, av fleire grunnar. For det første er ikkje klimakrisa for alle. Her på berget har vi råd til å kjøpe oss ut av dei verste effektane av ho, det kan ikkje urfolk i den kongolesiske regnskogen eller nomadar på tundraen i Sibir. Svært urettvist sidan ikkje noko anna land er ansvarleg for høgare klimautslepp per innbyggar enn Noreg. Dessutan er det altfor lett å utelukkande observere når vi er på tur, i staden for å søke deltaking og lokal kunnskap. Det er dei som bur og kjem frå ein stad som er ekspertane på sitt område. Dialog bidrar til brubygging og å få innsideinnsikt i kultur og tilhøve lokalt. Det er sjølvsagt kjekt at mange likar feriebileta vi legg ut på sosiale medium, men kva er eigentleg poenget med å reise om vi ikkje tek del i det som skjer der? Då går vi glipp av dialog på tvers av grenser og endar opp med mindre kunnskap, mindre forståing, mindre demokrati og mindre ytringsfridom.
Les meir
Sjå engelsk presentasjon av boka her
Les meir om forfattaren her
Sjå alle vårens fokustitlar frå NORLA her
