Heidi Marie Vestrheim - Fokustittelforfattar

Jenny Fender er valt ut som en av NORLAS fokustitler høsten 2023. Den er skrive av Heidi Marie Vestrheim, og her fortel ho meir om boka, kva som inspirerar ho, og kor og når ho jobbar aller best.

Kva handlar boka di om?

Jenny Fender handlar om 12 år gamle Jenny som veks opp i det ho kallar ei «gudsforlatt bygd» på Vestlandet. Hennar store draum er å bli rockestjerne, reise på verdensturné og gå på kule kafear saman med bestevenen sin Signe. Saman har dei nettopp starta bandet Nabovarsel og planlegg no livet som ekte rockestjerner; eit hardt og kult liv, men «ikkje bli sånne rockestjerner som er deprimerte og tar overdose og døyr i badekar».

Nabovarsel ser starten på noko stort då dei får sin aller fyrste spelejobb denne sumaren; nemleg å varme opp for «Sidergutane» som skal spele på den årlege Siderfestivalen. Men så skjer det ting som gjer at alt raknar for Jenny. Signe flyttar til Stavanger og både spelejobb og rockedraum står i fare. I tillegg kjem det ein ny nabo spankulerande inn på tunet, som er skikkeleg irriterande for ho har rocka sveis, trommer i kjellaren sin OG har vakse opp i den kule storbyen Oslo. Så Jenny må hate ho litt, men Jenny blir også ganske fascinert av denne nye-naboen…
Jenny Fender handlar om det å være ein draumar, om den overveldande overgangen mellom barn og ungdom, om pågangsmot og energi som krevst for å få livet til å køyre i den retninga ein sjølv vil. Men også om korleis ein skal greie å vere ein god bestevenn når ting skjer og nye kjensler lever sitt eige liv.

Kva inspirerte deg til å skrive denne boka?

Det er nok det at eg sjølv hadde likt å lese om Jenny som liten. Det er ikkje så mange bøker om jenter som diggar rock og har store draumar! Også elskar eg alt det som oppstår i det ein lagar band; øving, diskusjonar rundt bandnamn, kven skal gjere kva, korleis lage songar, kva skal tekstane handle om, vennskap og samarbeid. Også er det så kjekt å skrive om ei litt sånn rett fram jente frå bydga som treng meir plass enn omgivelsane kanskje gir ho. At ho elskar rock og fender-gitaren sin, tar plass og i tillegg forelskar seg i ei jente. Det er mykje fart i teksten og ho tør å drøyme stort. Eg har følt på eit overskudd når eg har skrevet, at det er eit «lett og godt» miljø for tankane mine å være i.

Kven er denne boka for?

Boka høver godt for born i alderen 9–12 som er interesserte i venskap og rockemusikk og ikkje altfor opptekne av My Little Pony og duftlys. Kvart kapitel i denne boka har sitt eige lydspor, så du kan lytte til musikk som høver til dei ulike kapitla. Høyr lydsporet før du les kapittelet , så kjem du i rett stemning! Kanskje finn du noko musikk du ikkje har lytta til før!

Kor og/eller kvar tid jobbar du best?

Oi, det er litt vanskeleg å svare på sidan eg berre har skrivi denne eine boka, men skrivinga går litt i rykk og napp. Eg trivst veldig godt med ein jevn arbeidsflyt, altså starte dagen med å skrive to-tre timar. Over fleire veker. Eg kan også gå fleire dagar eller veker utan å skrive, berre litt sånn korte sessions her og der, men det er mest digg når eg har rytmen på skrivinga, holde teksten varm og friskt i minnet. På slutten av Jenny Fender-skrivinga var det veldig intenst. Takk og pris for at eg er B-menneske; då har eg jobba 100% som redaktør i tv-programmet «alle mot 1» på dagen og skreiv bok på natta. Eg kan også skrive i bråkete miljø, som f.eks. på kafé eller med ungane mine springande rundt. Så lenge dei ikkje spør meg om noko, for då får dei ikkje svar… Eg er ekspert på å koble lyd ute, men likevel nyte at den er der.

Se engelsk presentasjon av boka her

Se alle høstens fokustitler fra NORLA her